Ազգային ժողովի «Քաղաքացիական պայմանագիր» խմբակցության քարտուղար Արթուր Հովհաննիսյանը 2021 թվականին ՀՀ պետական բյուջեից ստացել է տան վարձավճարի փոխհատուցում՝ ամսական 100 հազար դրամ, այն դեպքում, երբ չի համապատասխանել այդ փոխհատուցումը ստանալու համար օրենքով սահմանված պայմաններին։ Այս մասին հայտնում է «Ժողովուրդ» օրաթերթը՝ հղում անելով իր ձեռքի տակ հայտնված փաստաթղթերի։
Ինչպես հայտնի է, ԱԺ պատգամավորներին վարձավճարի փոխհատուցում տրամադրվում է միայն այն դեպքում, երբ նրանք բավարարում են մի քանի պայմանների։ Դրանք են՝ Երևան քաղաքում սեփականություն չունենալը, փաստացի վարձակալել բնակարան՝ կոնկրետ հասցեով, և ներկայացնել կադաստրի տեղեկանք՝ սեփականության բացակայության մասին, ինչպես նաև վարձակալության պայմանագիր։
Սակայն, ըստ «Ժողովուրդ» օրաթերթի տեղեկությունների, ԱԺ նախագահ Ալեն Սիմոնյանի կողմից Արթուր Հովհաննիսյանին փաստացի տրամադրվել է ամսական 100 հազար դրամի փոխհատուցում՝ չնայած այն հանգամանքին, որ նա մարզաբնակ չի եղել։
Հրապարակումը նշում է, որ «Ժողովուրդ» օրաթերթի ձեռքի տակ է հայտնվել փաստաթուղթ, որի համաձայն՝ Նար-Դոսի փողոցի վրա գտնվող բնակարանի վարձակալության պայմանագիրը կնքվել է 2021 թվականի նոյեմբերի 27-ին, սակայն կադաստրի կողմից վավերացվել միայն 2021 թվականի դեկտեմբերի 2-ին։
Այս փաստը նշանակում է, որ 2021 թվականի գրեթե ամբողջ ընթացքում, երբ Արթուր Հովհաննիսյանը Ազգային ժողովից՝ ՀՀ հպարտ հարկատուների հաշվին, ստացել է պետական բյուջեից վարձավճարի փոխհատուցում, նա չի ունեցել կադաստրով վավերացված վարձակալության պայմանագիր։ Հետևաբար, նա չի ունեցել իրավական հիմք այդ գումարները ստանալու համար, ինչը, ըստ օրենքի, ենթադրյալ ապօրինություն է։
Հրապարակումը նշում է, որ ԱԺ աշխատակազմը վարձավճարի փոխհատուցում տրամադրելիս նախապես հավաքում է փաստաթղթերը, և առանց դրանց փոխհատուցում չի տրամադրվում։ Պարտադիր փաստաթղթերի շարքում են կադաստրի տեղեկանքը՝ Երևանում սեփականություն չունենալու մասին, և վարձակալության պայմանագիրը՝ հստակ հասցեով։
«Ժողովուրդ» օրաթերթը հարցում է հանել, թե ինչու է ԱԺ ղեկավարությունը աչք փակել Արթուր Հովհաննիսյանի կողմից ներկայացված կիսատ փաստերի վրա։ Ըստ աղբյուրների՝ Արթուր Հովհաննիսյանը վարձավճարի փոխհատուցումը ստացել է հենց Նար-Դոսի հասցեում գտնվող տան համար, սակայն այդ հասցեով վարձակալության պայմանագիր այդ պահին գոյություն չի ունեցել։
Հրապարակումը ավարտվում է կոչով՝ պահանջելով, որ Կոռուպցիայի կանխարգելման հանձնաժողովը, ՀՀ հակակոռուպցիոն կոմիտեն և ՀՀ գլխավոր դատախազ Աննա Վարդպետյանը մանրամասն կուսումնասիրեն այս դեպքը՝ որպես հաղորդման հիմք ընդունելով ներկայացված փաստերը։
Հիշեցնենք, որ Արթուր Հովհաննիսյանը, ըստ ոստիկանության պաշտոնական տեղեկության, 2017-ին անցել է թմրանյութի գործով. նրա ավտոմեքենայից հայտնաբերվել էր 0.24 մգ թմրանյութ։
